Рекордсмен Иван. «Азия оҕолоро» IV оонньуулар чөмпүйүөннэрэ Иван Никифоров ыалдьыттыыр

Бүгүн кэпсиир чөмпүйүөммүт – 2008 сыллаах «Азия оҕолорун» дьоруойа. Иван Никифоров атах оонньууларын түөрт көрүҥэр төрдүеннэригэр кыайан, түөрт кыһыл көмүс мэтээли ылан, Саха сирин хамаандатыгар, ыалдьааччыларыгар улахан үөрүүнү аҕалбыта.

Иван Никифоров

Маны таһынан, Иван өссө оонньуулар yoннa өрөспүүбүлүкэ уолаттарын кылыыга (44 м 58 см), ыстаҥаҕа (43 м 55 см), троеборьеҕа (123 м 73 см) рекордарын олохтообута. Иван оччотооҕу дьарыгын, оонньуулар туһунан кэпсиир:
— Мин Ньурба улууһун Маарыттан төрүттээхпин. 2014 сыллаахха М.К.Аммосов аатынан ХИФУ автодорожнай факультетын бүтэрбитим, ол кэнниттэн аармыйаҕа сулууспалаан кэлбитим. Билигин «Модун» спорт киинигэр исписэлииһинэн үлэлиибин.
— Атах оонньуутунан дьарыктаныыны хаһааҥҥыттан саҕалаабыккыный?
— Иккис кылааска үөрэнэ сылдьан атах оонньуутунан дьарыктаныыны саҕалаабытым. Бастакы тренерим, оччотооҕу физкультура учуутала буолар. Бэһис кылаастан Өрөспүүбүлүкэ лицейигэр үөрэммитим, Ньурбаттан Дьокуускайга көһөн кэлбитим. Ол да буоллар дьарыктанарбын бырахпатаҕым. Үөрэҕим быыһыгар куруук араас күрэхтэһиилэргэ кыттарым, миэстэлэһэр этим. Бу санаатахха, мин оччолорго ону улахаҥҥа уурбат этим, арай тренердэрим дьарыкпын көрөн эбэн, өссө күүһүрдэн биэрэллэрэ. Ол аата, кинилэр миигин эрдэттэн бэлэмнии сылдьыбыттар эбит.
— «Азия оҕолоругар» хайдах бэлэмнэммитиҥ, кыттыбытыҥ, кыайбытыҥтуһунан кэпсээ.
— Биир күрэхтэһии кэнниттэн «Азия оҕолоругар» кыттаҕын диэбиттэрэ. Онтон тренердэр Соков Василий Викторовичка, Васильев Павел Васильевичка дьарыктаныыны саҕалаабытым. Ыстаҥаһыт уолаттар буоламмыт бары күҥҥэ иккитэ дьарыктанар этибит. Онно 11-с кылаас буолаары сылдьар этим. Оттон «Азия оҕолоро» күрэхтэһии кэмигэр долгуйбуппун өйдөөбөппүн. Финал көрүөх бэтэрээ өттүгэр түмүктэммитэ. Кыайбыппын бэйэм да билбэккэ хаалбытым. Кыайыы эрэ иһин киирсэбин диэн киирсибитим. Өссө рекордары олохтообуппуттан олус соһуйбутум.
— Билигин тоҕо күрэхтэспэт буоллуҥ?
— Күрэхтэһиилэргэ кыттыбаппын, бүтэһикпин күрэхтэһиигэ бастакы кууруска сылдьан кыттыбытым. Ол эрээри билигин даҕаны дьарыктанабын, дьарыкпын бырахпатаҕым. «Азия оҕолоруттан» олус элбэх доҕоттордоммутум, бииргэ дьарыктаммыт, күрэхтэспит уолаттарым Иннокентий Говоровы, Владислав Иванову кытта билсэбит. Спорт эйгэтигэр үлэлиир киһи буоларым быһыытынан, спордунан олоробун, спорт сонуннарын, спортсменнары кытта билсэ турабын.

 

“Саха сирэ” хаһыат, кулун тутар 15 күнэ, 2016 с.