Вячеслав Карпов 70 сааhын томточчу туолла!

Саха номоххо киирбит бөҕөһө Вячеслав Павлович Карповы  үөрүүлээх үбүлүөйүнэн, Манчаары Баһылай үбүлүөйдээх ХХ Спартакиадата чугаһаабытынан   эҕэрдэлээн туран, тус бэйэтигэр, кэргэнэ Татьяна Петровнаҕа, оҕолоругар, сиэннэригэр дьолу-соргуну, бары үчүгэйи баҕарабыт!

karpov

Улуу тренер Д.П. Коркин 1965 сыллаахха 15 союзнай өрөспүүбүлүкэлээх киэҥ нэлэмэн Сэбиэскэй Сойуус пьедесталын саамай үрдүкү үктэлигэр өрө көтүтэн таһаарбыт бастакы хараҥаччыта, ССРС, САССР спордун маастара, СӨ физическэй култуураҕа уонна спорка үтүөлээх үлэһитэ, СӨ ХХ үйэҕэ спорка лауреата, СӨ Д.П. Коркин аатынан Государственнай бириэмийэтин лауреата, Чурапчы улууһун уонна Чакыр нэһилиэгин бочуоттаах гражданина Вячеслав Павлович Карповы саха хапсаҕайга сүгүрүйээччилэрин ааттарыттан 70 сааһын томточчу туолбутунан итиитик-истиҥник эҕэрдэлиибит.

Сахалартан маҥнайгынан көҥүл тустууга ССРС уолаттарын 1965 с. кыайыылааҕа (Махачкала), Россия эдэрдэрин 1966 с. кыайыылааҕа (Нальчик), Россия улахан дьонун 1969 с. чемпиона (Новосибирскай), Россия норуоттарын 1971 с. V Спартакиадатын боруонса призера (Таганрог), Тбилиси норуоттар икки ардыларынааҕы турнирын 1966 с. боруонса призера, ССРС тыатын сирин спортсменнарын үс төгүллээх чемпиона, Болгария Раднево, Ямбул куораттарыгар норуоттар икки ардыларынааҕы турнирдар чемпиона, Али, Алиев, Нуркен Абдиров, Салават Юлаев, САССР Министрдэрин Сэбиэтин бириистэригэр Бүтүн Союзтааҕы турнирдар чемпиона, Сибиир уонна Дальнай Восток зонатын, Саха АССР үстүү төгүллээх чемпиона, аан дойду ветеран маастардарын 1994 с. (Италия) боруонса призера Вячеслав Карпов хапсаҕайга ситиһиилэрэ эмиэ чаҕылхайдар. Саха АССР 1967, 1968, 1989 сс. чемпиона, Манчаары Баһылай 1968 с. I Спартакиадатын чемпиона, САССР норуоттарын 1978 с. VIII Спартакиадатын чемпиона!

 

СӨ хапсаҕайга Федерацията.

Комментирование запрещено